mere nalon mein ham-sar josh-e-dariya ho nahin sakta

mire nāloñ meñ ham-sar josh-e-dariyā ho nahīñ saktā

mirā ham-gard sahrā meñ bagūlā ho nahīñ saktā

davā se hijr kā bīmār achchhā ho nahīñ saktā

duā se dekheñ ho saktā hai kuchh yā ho nahīñ saktā

vo bulbul huuñ ki fasl-e-gul meñ ġhauġhā ho nahīñ saktā

vo tuutī huuñ ki ā.īne se goyā ho nahīñ saktā

girāñ-jānī bhī is sanjīdgī ke saath hai mujh meñ

ki koh-e-kohkan pāsañg merā ho nahīñ saktā

chhupāo shakl yā taqrīr par be-parda kahtā huuñ

ki mujh ko tum se tum ko mujh se pardā ho nahīñ saktā

vo zarra huuñ ki ḳhurshīd-e-qayāmat bhī na chamkā.e

vo qatra huuñ samundar se bhī dariyā ho nahīñ saktā

vo gumrah huuñ ki ḳhizr aa.e hidāyat ko to gumrāh ho

vo murda huuñ ki iisā se bhī zinda ho nahīñ saktā

vo vahshī huuñ ki mujh se bhāgtā hai āhū-e-vahshat

vo majnūñ huuñ koī ham-pesha merā ho nahīñ saktā

vo sar-gashta huuñ vahshat har qadam chakrātī hai mujh se

mire daure meñ koī sar-ba-sahrā ho nahīñ saktā

qubūl-e-ḳhātir-o-lutf-e-suḳhan ai 'rashk' aur hī hai

nahīñ to shā.iroñ se aur kyā kyā ho nahīñ saktā

mere nalon mein ham-sar josh-e-dariya ho nahin sakta

mera ham-gard sahra mein bagula ho nahin sakta

dawa se hijr ka bimar achchha ho nahin sakta

dua se dekhen ho sakta hai kuchh ya ho nahin sakta

wo bulbul hun ki fasl-e-gul mein ghaugha ho nahin sakta

wo tuti hun ki aaine se goya ho nahin sakta

giran-jaani bhi is sanjidgi ke sath hai mujh mein

ki koh-e-kohkan pasang mera ho nahin sakta

chhupao shakl ya taqrir par be-parda kahta hun

ki mujh ko tum se tum ko mujh se parda ho nahin sakta

wo zarra hun ki KHurshid-e-qayamat bhi na chamkae

wo qatra hun samundar se bhi dariya ho nahin sakta

wo gumrah hun ki KHizr aae hidayat ko to gumrah ho

wo murda hun ki isa se bhi zinda ho nahin sakta

wo wahshi hun ki mujh se bhagta hai aahu-e-wahshat

wo majnun hun koi ham-pesha mera ho nahin sakta

wo sar-gashta hun wahshat har qadam chakraati hai mujh se

mere daure mein koi sar-ba-sahra ho nahin sakta

qubul-e-KHatir-o-lutf-e-suKHan ai 'rashk' aur hi hai

nahin to shairon se aur kya kya ho nahin sakta