mere nalon mein itna to asar hai

mire nāloñ meñ itnā to asar hai

shab-e-ġham hai magar kuchh muḳhtasar hai

ummīdeñ laa.e the ġham le ke uThe

ye rūdād-e-hayāt-e-muḳhtasar hai

nahīñ hai duur kuchh manzil hamārī

zamāna raah meñ haa.il magar hai

asīroñ ko rihā.ī mil to jaa.e

magar shart-e-shikast-e-bāl-o-par hai

vo rāheñ jin ko suunā kar ga.e vo

unhīñ par aaj tak merī nazar hai

jahāñ tum ho vahāñ haiñ laala o gul

jahāñ ham haiñ vahāñ barq-o-sharar hai

badal Daalā hai jis ne merā aalam

kisī kī ik nigāh-e-muḳhtasar hai

ilāhī ḳhair mere āshiyāñ kī

sabā ke saath phir mauj-e-sharar hai

mah o ḳhurshīd ko samjhā hai manzil

ḳhudāyā kis qadar aajiz bashar hai

mere nalon mein itna to asar hai

shab-e-gham hai magar kuchh muKHtasar hai

ummiden lae the gham le ke uThe

ye rudad-e-hayat-e-muKHtasar hai

nahin hai dur kuchh manzil hamari

zamana rah mein hail magar hai

asiron ko rihai mil to jae

magar shart-e-shikast-e-baal-o-par hai

wo rahen jin ko suna kar gae wo

unhin par aaj tak meri nazar hai

jahan tum ho wahan hain lala o gul

jahan hum hain wahan barq-o-sharar hai

badal Dala hai jis ne mera aalam

kisi ki ek nigah-e-muKHtasar hai

ilahi KHair mere aashiyan ki

saba ke sath phir mauj-e-sharar hai

mah o KHurshid ko samjha hai manzil

KHudaya kis qadar aajiz bashar hai