mere panw ke niche bhi zamin hai

mire paañv ke nīche bhī zamīñ hai

mujhe hijrat kā koī dukh nahīñ hai

kabhī nā-āshnā tujhe saare raste

magar har rāsta ab dil-nashīñ hai

kabhī saare hī mausam ajnabī the

magar ab dil meñ har mausam makīñ hai

kabhī merā badan hī thā yahāñ par

magar ab dil kī duniyā bhī yahīñ hai

kabhī har shaam be-manzar yahāñ thī

magar har shaam ab behad hasīñ hai

to kyā maiñ naqsh-e-māzī bhuul baiThā

nahīñ aisā nahīñ aisā nahīñ hai

havā.eñ dost ban jaa.eñ jahāñ par

vahī 'ashfāq' dil kī sar-zamīñ hai

mere panw ke niche bhi zamin hai

mujhe hijrat ka koi dukh nahin hai

kabhi na-ashna tujhe sare raste

magar har rasta ab dil-nashin hai

kabhi sare hi mausam ajnabi the

magar ab dil mein har mausam makin hai

kabhi mera badan hi tha yahan par

magar ab dil ki duniya bhi yahin hai

kabhi har sham be-manzar yahan thi

magar har sham ab behad hasin hai

to kya main naqsh-e-mazi bhul baiTha

nahin aisa nahin aisa nahin hai

hawaen dost ban jaen jahan par

wahi 'ashfaq' dil ki sar-zamin hai