mere sajda-e-ha-e-niyaz ko tere aastan ki talash hai

mire sajda-e-hā-e-niyāz ko tire āstāñ kī talāsh hai

kisī fard kī ye talab nahīñ ye to ik jahāñ kī talāsh hai

na.ī sarzamīñ kī hai justujū na.e āsmāñ kī talāsh hai

jo makāñ bhī Thiik na rakh sake unheñ lā-makāñ kī talāsh hai

mire pā-e-shauq-e-safar meñ haiñ abhī rāh-o-rasm kī bandisheñ

mujhe naqsh-e-pā kī hai justujū mujhe kārvāñ kī talāsh hai

jo ḳhizāñ-nasīb azal ke haiñ unheñ fasl-e-gul kī hai aarzū

vo jo thak chuke haiñ bahār se unheñ ab ḳhizāñ kī talāsh hai

ye mirā kamāl-e-musavvarī ye mirā shu.ūr-e-sanam-garī

abhī zauq husn-e-kasīf hai ise jism-o-jāñ kī talāsh hai

mirī zindagī kā fasāna kyā jo sināoñ shauq se aap ko

kisī mehrbāñ kī talāsh thī kisī mehrbāñ kī talāsh hai

jo qafas se chhūT ke aa.e ham kisī shāḳh ne bhī jagah na dī

haiñ chaman meñ aa ke bhī be-navā hameñ āshiyāñ kī talāsh hai

abhī qarz un kī nazar pe hai tire jalva-hā-e-majāz kā

jo haqīqatoñ se guzar chuke unheñ dāstāñ kī talāsh hai

tire dushmanoñ kī safoñ pe ye kisī daur meñ na chamak sakī

tirī teġh-e-nāz kī aaj tak sar-e-dostāñ kī talāsh hai

ḳhas-o-ḳhār ko bhī jo diye 'razā' tar-o-tāza rahne kā hausla

usī bāġhbāñ kī hai aarzū usī gulsitāñ kī talāsh hai

mere sajda-e-ha-e-niyaz ko tere aastan ki talash hai

kisi fard ki ye talab nahin ye to ek jahan ki talash hai

nai sarzamin ki hai justuju nae aasman ki talash hai

jo makan bhi Thik na rakh sake unhen la-makan ki talash hai

mere pa-e-shauq-e-safar mein hain abhi rah-o-rasm ki bandishen

mujhe naqsh-e-pa ki hai justuju mujhe karwan ki talash hai

jo KHizan-nasib azal ke hain unhen fasl-e-gul ki hai aarzu

wo jo thak chuke hain bahaar se unhen ab KHizan ki talash hai

ye mera kamal-e-musawwari ye mera shuur-e-sanam-gari

abhi zauq husn-e-kasif hai ise jism-o-jaan ki talash hai

meri zindagi ka fasana kya jo sinaon shauq se aap ko

kisi mehrban ki talash thi kisi mehrban ki talash hai

jo qafas se chhuT ke aae hum kisi shaKH ne bhi jagah na di

hain chaman mein aa ke bhi be-nawa hamein aashiyan ki talash hai

abhi qarz un ki nazar pe hai tere jalwa-ha-e-majaz ka

jo haqiqaton se guzar chuke unhen dastan ki talash hai

tere dushmanon ki safon pe ye kisi daur mein na chamak saki

teri tegh-e-naz ki aaj tak sar-e-dostan ki talash hai

KHas-o-KHar ko bhi jo diye 'raza' tar-o-taza rahne ka hausla

usi baghban ki hai aarzu usi gulsitan ki talash hai