mere shajar tujhe mausam naya banate rahen

mire shajar tujhe mausam nayā banāte raheñ

gulāb-e-sabr tirī Tahniyoñ pe aate raheñ

jo dostoñ kī kamānoñ ko tiir detā hai

hameñ ye zarf bhī baḳhshe ki zaḳhm khāte raheñ

bas ik charāġh hai apnī mata-e-besh-bahā

so shaam aatī rahe ham use jalāte raheñ

sahar ke rañg darīchoñ ko sair karte jaa.eñ

havā ke jhoñke khule āñganoñ meñ aate raheñ

kabhī kabhī koī sūraj tulū hotā rahe

ridā-e-abr meñ taare bhī muñh chhupāte raheñ

fasīl-e-shahr-e-anā rafta rafta girtī jaa.e

ye zalzale mirī jaañ meñ hamesha aate raheñ

mere shajar tujhe mausam naya banate rahen

gulab-e-sabr teri Tahniyon pe aate rahen

jo doston ki kamanon ko tir deta hai

hamein ye zarf bhi baKHshe ki zaKHm khate rahen

bas ek charagh hai apni mata-e-besh-baha

so sham aati rahe hum use jalate rahen

sahar ke rang darichon ko sair karte jaen

hawa ke jhonke khule aanganon mein aate rahen

kabhi kabhi koi suraj tulu hota rahe

rida-e-abr mein tare bhi munh chhupate rahen

fasil-e-shahr-e-ana rafta rafta girti jae

ye zalzale meri jaan mein hamesha aate rahen