mere sine mein rah kar KHud mujhi se dushmani kab tak

mire siine meñ rah kar ḳhud mujhī se dushmanī kab tak

dil-e-nādān khā.egā fareb-e-dostī kab tak

mire ehsās ke sahrā jalegā tū yūñhī kab tak

bujhā.ūñ roz ashkoñ se maiñ terī tishnagī kab tak

alam-bardār ho tum laisa-lil-insān ke logo

rahoge tum zamāne meñ shikār-e-be-hisī kab tak

masā.il kā tumhāre hal nahīñ taqlīd-e-maġhrib meñ

kisī gum-karda manzil se umīd-e-rahbarī kab tak

'ġhazālī' 'rāzī'-o-'rūmī' kī taḳhlīqāt bhī dekho

karoge marx hegel Darvin kī pairvī kab tak

jhukāo sar ḳhudā ke sāmne ye sar-kashī chhoḌo

jabīn-e-kibr āḳhir be-niyāz-e-bandagī kab tak

jahān-e-chand-roza meñ kisī se dushmanī kaisī

hamārī zindagī kitnī hamārī dushmanī kab tak

jafā-pesha zamāne meñ vafā kī justujū 'nashtar'

guzāregā sarāboñ ke sahāre zindagī kab tak

mere sine mein rah kar KHud mujhi se dushmani kab tak

dil-e-nadan khaega fareb-e-dosti kab tak

mere ehsas ke sahra jalega tu yunhi kab tak

bujhaun roz ashkon se main teri tishnagi kab tak

alam-bardar ho tum laisa-lil-insan ke logo

rahoge tum zamane mein shikar-e-be-hisi kab tak

masail ka tumhaare hal nahin taqlid-e-maghrib mein

kisi gum-karda manzil se umid-e-rahbari kab tak

'ghazali' 'raazi'-o-'rumi' ki taKHliqat bhi dekho

karoge marx hegel Darwin ki pairwi kab tak

jhukao sar KHuda ke samne ye sar-kashi chhoDo

jabin-e-kibr aaKHir be-niyaz-e-bandagi kab tak

jahan-e-chand-roza mein kisi se dushmani kaisi

hamari zindagi kitni hamari dushmani kab tak

jafa-pesha zamane mein wafa ki justuju 'nashtar'

guzarega sarabon ke sahaare zindagi kab tak