mere sine mein soz-e-arzu kis ki inayat hai

mire siine meñ soz-e-ārzū kis kī ināyat hai

subū merā mai-e-nāb-e-subū kis kī ināyat hai

jahān-e-ḳhāk-zā meñ ek zarra hai vajūd apnā

magar zarre meñ zauq-e-justujū kis kī ināyat hai

garebāñ kahkashāñ kā thaam letī hai nazar apnī

junūn-o-shauq shor-e-hā-o-hū kis kī ināyat hai

ye maanā bāġhbāñ maiñ huuñ ye sehn-e-gulsitāñ merā

magar phūloñ meñ josh-e-rang-o-bū kis kī ināyat hai

musavvir huuñ ye mere rang haiñ ye mū-qalam merā

magar tasvīr meñ rang-e-numū kis kī ināyat hai

ye mizrāb-o-surūd-o-sāz-e-mahfil sab mire lekin

muġhannī kā dil-e-āhang-jū kis kī ināyat hai

ye mumkin hai nigāh-e-ishq se pinhāñ rahe jalva

magar ehsās-e-zulf-e-mushk-bū kis kī ināyat hai

ye merī bandish-e-alfāz ye merī ġhazal 'sālik'

mire sheroñ meñ pinhāñ guftugū kis kī ināyat hai

mere sine mein soz-e-arzu kis ki inayat hai

subu mera mai-e-nab-e-subu kis ki inayat hai

jahan-e-KHak-za mein ek zarra hai wajud apna

magar zarre mein zauq-e-justuju kis ki inayat hai

gareban kahkashan ka tham leti hai nazar apni

junun-o-shauq shor-e-ha-o-hu kis ki inayat hai

ye mana baghban main hun ye sehn-e-gulsitan mera

magar phulon mein josh-e-rang-o-bu kis ki inayat hai

musawwir hun ye mere rang hain ye mu-qalam mera

magar taswir mein rang-e-numu kis ki inayat hai

ye mizrab-o-surud-o-saz-e-mahfil sab mere lekin

mughanni ka dil-e-ahang-ju kis ki inayat hai

ye mumkin hai nigah-e-ishq se pinhan rahe jalwa

magar ehsas-e-zulf-e-mushk-bu kis ki inayat hai

ye meri bandish-e-alfaz ye meri ghazal 'salik'

mere sheron mein pinhan guftugu kis ki inayat hai