mere sine se ranj-o-gham ki tughyani nahin jati

mire siine se ranj-o-ġham kī tuġhyānī nahīñ jaatī

ilāhī kyā karūñ dil kī pareshānī nahīñ jaatī

mujhe ġhairoñ ke jhūTe dāva-e-ulfat se kyā matlab

ġhazab ye hai mirī haq baat bhī maanī nahīñ jaatī

kiyā us chashm-e-ishq-afroz ne barbād duniyā meñ

magar phir bhī nazar kī fitna-sāmānī nahīñ jaatī

tahayyur hai mohabbat ke natā.ej tū ne dekhe haiñ

magar afsos ai dil terī nādānī nahīñ jaatī

paḌe haiñ pech sumbul meñ yahāñ ā.īna hairāñ hai

ta.ajjub hai ki gesū kī pareshānī nahīñ jaatī

jahāñ meñ har taraf sāmān-e-ishrat bhī muhayyā hai

sabab kyā hai mirī ġham kī farāvānī nahīñ jaatī

dilāyā yaad us paimāñ-shikan ko va.ada kyuuñ maiñ ne

pareshāñ huuñ kisī sūrat pashemānī nahīñ jaatī

hazāroñ nāmvar aa kar base shahr-e-ḳhamoshāñ meñ

magar is sar-zamīñ kī phir bhī vīrānī nahīñ jaatī

pa.e daryāft asrār-e-haqīqat sab haiñ sargardāñ

falak ke paar lekin aql-e-insānī nahīñ jaatī

natīja nek hai īsār kā duniyā-o-uqbā meñ

haqīqat meñ kabhī be-kār qurbānī nahīñ jaatī

asar kyā ḳhaak ho merī fuġhāñ kā us pe ai 'hāfiz'

mirī āvāz tak us ghar meñ pahchānī nahīñ jaatī

mere sine se ranj-o-gham ki tughyani nahin jati

ilahi kya karun dil ki pareshani nahin jati

mujhe ghairon ke jhuTe dawa-e-ulfat se kya matlab

ghazab ye hai meri haq baat bhi mani nahin jati

kiya us chashm-e-ishq-afroz ne barbaad duniya mein

magar phir bhi nazar ki fitna-samani nahin jati

tahayyur hai mohabbat ke nataej tu ne dekhe hain

magar afsos ai dil teri nadani nahin jati

paDe hain pech sumbul mein yahan aaina hairan hai

tajjub hai ki gesu ki pareshani nahin jati

jahan mein har taraf saman-e-ishrat bhi muhayya hai

sabab kya hai meri gham ki farawani nahin jati

dilaya yaad us paiman-shikan ko wada kyun main ne

pareshan hun kisi surat pashemani nahin jati

hazaron namwar aa kar base shahr-e-KHamoshan mein

magar is sar-zamin ki phir bhi virani nahin jati

pae daryaft asrar-e-haqiqat sab hain sargardan

falak ke par lekin aql-e-insani nahin jati

natija nek hai isar ka duniya-o-uqba mein

haqiqat mein kabhi be-kar qurbani nahin jati

asar kya KHak ho meri fughan ka us pe ai 'hafiz'

meri aawaz tak us ghar mein pahchani nahin jati