mere simTe lahu ka istiara le gaya koi

mire simTe lahū kā isti.ārā le gayā koī

mujhe phailā gayā har-sū kinārā le gayā koī

bas ab to māñgtā phirtā huuñ apne aap ko sab se

mirī sāñsoñ meñ jo kuchh thā vo saarā le gayā koī

badan meñ jo ḳhalāoñ kā nagar thā vo bhī ḳhālī hai

mirī tahzīb kā tanhā manāra le gayā koī

jahāñ se bhaag niklā thā vahīñ patthar huā āḳhir

mujhe sāñsoñ kī sarhad tak dobārā le gayā koī

azal se ab talak mujh ko ishāre kar rahā thā jo

shab-e-nā-āshnā se vo sitāra le gayā koī

mere simTe lahu ka istiara le gaya koi

mujhe phaila gaya har-su kinara le gaya koi

bas ab to mangta phirta hun apne aap ko sab se

meri sanson mein jo kuchh tha wo sara le gaya koi

badan mein jo KHalaon ka nagar tha wo bhi KHali hai

meri tahzib ka tanha manara le gaya koi

jahan se bhag nikla tha wahin patthar hua aaKHir

mujhe sanson ki sarhad tak dobara le gaya koi

azal se ab talak mujh ko ishaare kar raha tha jo

shab-e-na-ashna se wo sitara le gaya koi