mere sipurd kahan wo KHazana karta tha

mire sipurd kahāñ vo ḳhazāna kartā thā

sulūk kartā thā aur ġhā.ebāna kartā thā

'ajīb us kī talab thī 'ajab thā asp-savār

ki mulk-o-māl kī parvā zarā na kartā thā

uThā rakhā thā usī par se e'tibār tamām

aur intizār bhī us kā zamāna kartā thā

safar-girafta rahe kushtagān-e-nān-o-namak

koī hamāre liye faisla na kartā thā

shi’ār-e-zīst hunar thā so ham na jaan sake

jo kaam ham ne kiyā dūsrā na kartā thā

fazā meñ haath to uTThe the ek saath ka.ī

kisī ke vāste koī du'ā na kartā thā

unhīñ gharoñ se 'ibārat thī apnī shām-e-jahāñ

charāġh-e-tāq bhī aksar jalā na kartā thā

tamām sūrat-e-tartīb us ko aatī hai

agarche ḳhair ko shar se judā na kartā thā

mere sipurd kahan wo KHazana karta tha

suluk karta tha aur ghaebana karta tha

'ajib us ki talab thi 'ajab tha asp-sawar

ki mulk-o-mal ki parwa zara na karta tha

uTha rakha tha usi par se e'tibar tamam

aur intizar bhi us ka zamana karta tha

safar-girafta rahe kushtagan-e-nan-o-namak

koi hamare liye faisla na karta tha

shi’ar-e-zist hunar tha so hum na jaan sake

jo kaam hum ne kiya dusra na karta tha

faza mein hath to uTThe the ek sath kai

kisi ke waste koi du'a na karta tha

unhin gharon se 'ibarat thi apni sham-e-jahan

charagh-e-taq bhi aksar jala na karta tha

tamam surat-e-tartib us ko aati hai

agarche KHair ko shar se juda na karta tha