mere sipurd kiya hai na KHud liya hai mujhe

mire sipurd kiyā hai na ḳhud liyā hai mujhe

kisī ne hairat-e-imkāñ meñ rakh diyā hai mujhe

bachā nahīñ maiñ zarā bhī badan ke bartan meñ

tire ḳhayāl ne be-sāḳhta piyā hai mujhe

tū ek shaḳhs hai lekin tirī mohabbat meñ

dil-o-dimāġh ne taqsīm kar diyā hai mujhe

maiñ apnī samt bhī dekhūñ to kufr lagtā hai

ḳhudā ne yaad baḌī chaah se kiyā hai mujhe

judā.ī ranj udāsī añdherā ḳhauf ghuTan

har ek yaar ne dil khol kar jiyā hai mujhe

tumhāre baa'd nahīñ ab kisī kī gunjā.ish

ki tum ne itnā mohabbat se bhar diyā hai mujhe

mere sipurd kiya hai na KHud liya hai mujhe

kisi ne hairat-e-imkan mein rakh diya hai mujhe

bacha nahin main zara bhi badan ke bartan mein

tere KHayal ne be-saKHta piya hai mujhe

tu ek shaKHs hai lekin teri mohabbat mein

dil-o-dimagh ne taqsim kar diya hai mujhe

main apni samt bhi dekhun to kufr lagta hai

KHuda ne yaad baDi chah se kiya hai mujhe

judai ranj udasi andhera KHauf ghuTan

har ek yar ne dil khol kar jiya hai mujhe

tumhaare ba'd nahin ab kisi ki gunjaish

ki tum ne itna mohabbat se bhar diya hai mujhe