مرے سخن کو وہ اعجاز دے خدائے سخن

مرے سخن کو وہ اعجاز دے خدائے سخن

کہ حرف حرف بنے گنج‌‌ بے بہائے سخن

سکوت توڑے کبھی تو بھی دل کی بات کہے

خدا کرے کبھی تیرے بھی لب پہ آئے سخن

غضب خدا کا کڑی دھوپ کا طویل سفر

اور اس سفر کا اثاثہ بس اک ردائے سخن

حدیث غم کا بیاں ہے بغیر جنبش لب

ہے خامشی بھی مری عین مدعائے سخن

بدن سے لپٹی رہی تار تار ہو کر بھی

ہمیں عزیز بھلا کیوں نہ ہو قبائےسخن

حکایت غم دل کہہ کے سینے پڑ گئے لب

ہمیں یہ چپ بھی لگی ہے تو بر بنائے سخن

نبھے تو کیسے نبھے اب یہ سوچنا ہے وقارؔ

کہ وہ سخن سے گریزاں ہے میں فدائے سخن