مرے سخن میں نئے رنگ بھرنے والا ہے

مرے سخن میں نئے رنگ بھرنے والا ہے

فلک سے چاند زمیں پر اترنے والا ہے

یہ ایک کام تو ہر شخص کرنے والا ہے

جو جی رہا ہے یقیناً وہ مرنے والا ہے

یہ سانحہ ہے عجب خیمۂ بدن سے پرے

سنا ہے قافلۂ جاں ٹھہرنے والا ہے

نظر جھکا کے مری سمت دیکھیے صاحب

ستارہ خاک سے میری ابھرنے والا ہے

سمیٹ رکھا ہے جس کو ردائے فرقت میں

وہ نور وصل کوئی دم بکھرنے والا ہے

نہیں خبر ہے کسی کو عذاب چیخوں کا

سماعتوں کی زمیں پر اترنے والا ہے

ہوں سنگ راہ کوئی شیشۂ جمال نہیں

یہ کون دیکھ کے مجھ کو سنورنے والا ہے

رہا جو خواب میں تمثیل آئنہ بن کر

مری نظر سے وہ منظر گزرنے والا ہے

کہیں تباہ نہ کر دے اسے یہ خبط اشہرؔ

ہوا کے پر وہ شکاری کترنے والا ہے