mere suKHan mein nae rang bharne wala hai

mire suḳhan meñ na.e rang bharne vaalā hai

falak se chāñd zamīñ par utarne vaalā hai

ye ek kaam to har shaḳhs karne vaalā hai

jo jī rahā hai yaqīnan vo marne vaalā hai

ye sāneha hai ajab ḳhema-e-badan se pare

sunā hai qāfila-e-jāñ Thaharne vaalā hai

nazar jhukā ke mirī samt dekhiye sāhib

sitāra ḳhaak se merī ubharne vaalā hai

sameT rakkhā hai jis ko ridā-e-furqat meñ

vo nūr-e-vasl koī dam bikharne vaalā hai

nahīñ ḳhabar hai kisī ko azaab chīḳhoñ kā

samā.atoñ kī zamīñ par utarne vaalā hai

huuñ sang-e-rāh koī shīsha-e-jamāl nahīñ

ye kaun dekh ke mujh ko sañvarne vaalā hai

rahā jo ḳhvāb meñ tamsīl-e-ā.ina ban kar

mirī nazar se vo manzar guzarne vaalā hai

kahīñ tabāh na kar de use ye ḳhabt 'ash.har'

havā ke par vo shikārī katarne vaalā hai

mere suKHan mein nae rang bharne wala hai

falak se chand zamin par utarne wala hai

ye ek kaam to har shaKHs karne wala hai

jo ji raha hai yaqinan wo marne wala hai

ye saneha hai ajab KHema-e-badan se pare

suna hai qafila-e-jaan Thaharne wala hai

nazar jhuka ke meri samt dekhiye sahib

sitara KHak se meri ubharne wala hai

sameT rakkha hai jis ko rida-e-furqat mein

wo nur-e-wasl koi dam bikharne wala hai

nahin KHabar hai kisi ko azab chiKHon ka

samaaton ki zamin par utarne wala hai

hun sang-e-rah koi shisha-e-jamal nahin

ye kaun dekh ke mujh ko sanwarne wala hai

raha jo KHwab mein tamsil-e-aina ban kar

meri nazar se wo manzar guzarne wala hai

kahin tabah na kar de use ye KHabt 'ashhar'

hawa ke par wo shikari katarne wala hai