مرے سخن سے سیاست کی بو نہیں آتی

مرے سخن سے سیاست کی بو نہیں آتی

گھما پھرا کے مجھے گفتگو نہیں آتی

وہی ہنر ہے وہی ہم ہیں کینوس پہ مگر

ہماری شکل کبھی ہو بہو نہیں آتی

کیا ہے اس نے تیمم ندی کے ساحل پر

سمجھ میں حجت ترک وضو نہیں آتی

ہمارا دل بھی ہے زخموں سے چور چور بہت

صدائے درد مگر کو بکو نہیں آتی

نباہ کرتی اگر وہ تری طرح مجھ سے

مری حیات میں شاید کہ تو نہیں آتی

وہ بات ایسی نہیں تھی کہ بھول جاتا میں

جو بات یاد ترے روبرو نہیں آتی