mere ujDe chaman mein bhi kabhi ya-rab bahaar aae

mire ujḌe chaman meñ bhī kabhī yā-rab bahār aa.e

ḳhizāñ har baar aa.ī mausam-e-gul ek baar aa.e

chalā huuñ maut aa.e raah meñ yā kū-e-yār aa.e

kisī sūrat se dil kī be-qarārī ko qarār aa.e

kaḌak bijlī kī sunte hī lipaT jaate haiñ siine meñ

garaj ai abr-e-bārāñ aisā mauqa baar baar aa.e

nigāhoñ meñ tirī jo kaif hai mai meñ kahāñ saaqī

agar tū dekh le duzdīda nazroñ meñ ḳhumār aa.e

tasadduq dil ko kar duuñ jaan ko qurbān kar Dālūñ

magar us bad-gumāñ ko kaash merā e.atibār aa.e

masīhā ban ke mujh ko maut ne chhuTkārā dilvāyā

phañse the aa ke daldal meñ baḌī mushkil se paar aa.e

ġham-o-andoh se baḌh kar aziyyat is kī hai 'sālik'

na koī monis-o-hamdam na koī ġham-gusār aa.e

mere ujDe chaman mein bhi kabhi ya-rab bahaar aae

KHizan har bar aai mausam-e-gul ek bar aae

chala hun maut aae rah mein ya ku-e-yar aae

kisi surat se dil ki be-qarari ko qarar aae

kaDak bijli ki sunte hi lipaT jate hain sine mein

garaj ai abr-e-baran aisa mauqa bar bar aae

nigahon mein teri jo kaif hai mai mein kahan saqi

agar tu dekh le duzdida nazron mein KHumar aae

tasadduq dil ko kar dun jaan ko qurban kar Dalun

magar us bad-guman ko kash mera eatibar aae

masiha ban ke mujh ko maut ne chhuTkara dilwaya

phanse the aa ke daldal mein baDi mushkil se par aae

gham-o-andoh se baDh kar aziyyat is ki hai 'salik'

na koi monis-o-hamdam na koi gham-gusar aae