mere wahm-o-guman pe raat din chhai udasi hai

mire vahm-o-gumāñ pe raat din chhā.ī udāsī hai

pahan kar ḳhvāhishoñ kā ye badan aa.ī udāsī hai

parinda jism ke piñjre meñ aayā to bahut ḳhush thā

magar us ne sahar se shaam tak paa.ī udāsī hai

koī batlā.e ki ab kis tarah pā.ūñ sukūn-e-dil

mere is jism ke piñjre meñ dar aa.ī udāsī hai

chaman be-rang afsurda kalī har phuul be-ḳhushbū

bahāroñ kī fazā bhī is baras laa.ī udāsī hai

nazar aayā nahīñ mujh ko mirā gul-rang chehra jab

kahā ā.īne ne hazrat ye tanhā.ī udāsī hai

har ik sū shahr-e-dil-ārām meñ jashn-e-bahārāñ thā

fazā mere hī ghar āñgan kī kahlā.ī udāsī hai

ghaTā chhāte hī jaise dhuup chhaT jaatī hai āñgan kī

tujhe aate zarā dekhā to sharmā.ī udāsī hai

mere wahm-o-guman pe raat din chhai udasi hai

pahan kar KHwahishon ka ye badan aai udasi hai

parinda jism ke pinjre mein aaya to bahut KHush tha

magar us ne sahar se sham tak pai udasi hai

koi batlae ki ab kis tarah paun sukun-e-dil

mere is jism ke pinjre mein dar aai udasi hai

chaman be-rang afsurda kali har phul be-KHushbu

bahaaron ki faza bhi is baras lai udasi hai

nazar aaya nahin mujh ko mera gul-rang chehra jab

kaha aaine ne hazrat ye tanhai udasi hai

har ek su shahr-e-dil-aram mein jashn-e-bahaaran tha

faza mere hi ghar aangan ki kahlai udasi hai

ghaTa chhate hi jaise dhup chhaT jati hai aangan ki

tujhe aate zara dekha to sharmai udasi hai