mere wajud ke dozaKH ko sard kar dega

mire vajūd ke dozaḳh ko sard kar degā

agar vo abr-e-karam hai to khul ke barsegā

gila na kar ki hai āġhāz-e-shab abhī pyāre

Dhalegī raat to ye dard aur chamkegā

qadah kī ḳhair sunāo ki ab ke bārish-e-sañg

agar huī to tarab-zār-e-shab bhī Dūbegā

ye shahr-e-kam-nazarāñ hai idhar na kar āñkheñ

yahāñ ishāra-e-mizhgāñ koī na samjhegā

maiñ us badan meñ utar jā.ūñgā nashe kī tarah

vo ek baar agar phir palaT ke dekhegā

ravāñ to huuñ sū-e-aflāk-e-ārzū lekin

ye zor-e-mauj-e-havā bāzuoñ ko toḌegā

agar hai shauq-e-asīrī to muuñd le āñkheñ

tū umr bhar dar-o-dīvār bhī na dekhegā

talāsh-e-qāfila-e-zindagī hai ab be-sūd

ye rah-guzār-e-nafas par kahīñ na Thahregā

na aañkh meñ koī jumbish na paañv par koī gard

jahāñ se itnā bhī mohtāt kaun guzregā

rahegī dil meñ na jab koī bhī ḳhalish 'mohsin'

bhulā chukā hai jise tū use pukāregā

mere wajud ke dozaKH ko sard kar dega

agar wo abr-e-karam hai to khul ke barsega

gila na kar ki hai aaghaz-e-shab abhi pyare

Dhalegi raat to ye dard aur chamkega

qadah ki KHair sunao ki ab ke barish-e-sang

agar hui to tarab-zar-e-shab bhi Dubega

ye shahr-e-kam-nazaran hai idhar na kar aankhen

yahan ishaara-e-mizhgan koi na samjhega

main us badan mein utar jaunga nashe ki tarah

wo ek bar agar phir palaT ke dekhega

rawan to hun su-e-aflak-e-arzu lekin

ye zor-e-mauj-e-hawa bazuon ko toDega

agar hai shauq-e-asiri to mund le aankhen

tu umr bhar dar-o-diwar bhi na dekhega

talash-e-qafila-e-zindagi hai ab be-sud

ye rah-guzar-e-nafas par kahin na Thahrega

na aankh mein koi jumbish na panw par koi gard

jahan se itna bhi mohtat kaun guzrega

rahegi dil mein na jab koi bhi KHalish 'mohsin'

bhula chuka hai jise tu use pukarega