meri aankhon mein aa dil mein utar paiwand-e-jaan ho ja

mirī āñkhoñ meñ aa dil meñ utar paivand-e-jāñ ho jā

maiñ benām-o-nishāñ huuñ tū mirā nām-o-nishāñ ho jā

kabhī to āḳhir-e-shab phuul sā khil mere āñgan meñ

kabhī mere navāh-e-jism meñ ḳhushbū-e-jāñ ho jā

tū mere dasht-e-harf-o-saut ko barg-e-ḳhamoshī de

tū merī aañkh meñ gum-gashta-e-hairat-nishāñ ho jā

magar ye zaat kā ban-bās kab tak bhognā hogā

kisī parbat ke pīchhe se bulā, kuchh mehrbāñ ho jā

mirī rātoñ ko qatra qatra shabnam bāñTne vaale

kabhī mānind-e-dariyā merī āñkhoñ se ravāñ ho jā

vo dekho kahkashāñ sā ik jazīra muntazir apnā

mujhe nayyā banā apnī tū merā bādbāñ ho jā

meri aankhon mein aa dil mein utar paiwand-e-jaan ho ja

main benam-o-nishan hun tu mera nam-o-nishan ho ja

kabhi to aaKHir-e-shab phul sa khil mere aangan mein

kabhi mere nawah-e-jism mein KHushbu-e-jaan ho ja

tu mere dasht-e-harf-o-saut ko barg-e-KHamoshi de

tu meri aankh mein gum-gashta-e-hairat-nishan ho ja

magar ye zat ka ban-bas kab tak bhogna hoga

kisi parbat ke pichhe se bula, kuchh mehrban ho ja

meri raaton ko qatra qatra shabnam banTne wale

kabhi manind-e-dariya meri aankhon se rawan ho ja

wo dekho kahkashan sa ek jazira muntazir apna

mujhe nayya bana apni tu mera baadban ho ja