meri aadat hai main har rahbar se baat karta hun

mirī aadat hai maiñ har rāhbar se baat kartā huuñ

guzartā huuñ jo raste se shajar se baat kartā huuñ

maiñ tujh se baat karne ko tire kirdār meñ aa kar

idhar se phone kartā huuñ udhar se baat kartā huuñ

maiñ tere saath to ghar meñ baḌā ḳhāmosh rahtā thā

nahīñ maujūd tū ghar meñ to ghar se baat kartā huuñ

ḳhizāñ kā koī manzar mere andar raqs kartā hai

kabhī jo ban meñ gul se yā samar se baat kartā huuñ

suḳhan ke fan ko aise hī to zaa.e.a kar nahīñ saktā

so maiñ ḳhud se yā phir ahl-e-nazar se baat kartā huuñ

meri aadat hai main har rahbar se baat karta hun

guzarta hun jo raste se shajar se baat karta hun

main tujh se baat karne ko tere kirdar mein aa kar

idhar se phone karta hun udhar se baat karta hun

main tere sath to ghar mein baDa KHamosh rahta tha

nahin maujud tu ghar mein to ghar se baat karta hun

KHizan ka koi manzar mere andar raqs karta hai

kabhi jo ban mein gul se ya samar se baat karta hun

suKHan ke fan ko aise hi to zaea kar nahin sakta

so main KHud se ya phir ahl-e-nazar se baat karta hun