meri aankhon ke har manzar ki har taswir mein tum ho

mirī āñkhoñ ke har manzar kī har tasvīr meñ tum ho

mirī guftār meñ tum ho mirī taqdīr meñ tum ho

tumheñ chāhā tumheñ māñgā tumheñ dil meñ basāyā hai

mire andar hai jo ābād us jāgīr meñ tum ho

bahut masrūf rahte ho kabhī milne nahīñ aate

na jaane kaun sī uljhī huī zanjīr meñ tum ho

mire ḳhvāboñ meñ aate ho haqīqat meñ nahīñ aate

nahīñ mere magar har ḳhvāb kī tā'bīr meñ tum ho

tumhāre vāste maiñ ne kabhī likkhā nahīñ kuchh bhī

magar jab paḌh rahī huuñ to mirī tahrīr meñ tum ho

hamesha māñgtī huuñ maiñ tumheñ apnī du'āoñ meñ

ḳhudā kā faisla ye hai mirī taqdīr meñ tum ho

meri aankhon ke har manzar ki har taswir mein tum ho

meri guftar mein tum ho meri taqdir mein tum ho

tumhein chaha tumhein manga tumhein dil mein basaya hai

mere andar hai jo aabaad us jagir mein tum ho

bahut masruf rahte ho kabhi milne nahin aate

na jaane kaun si uljhi hui zanjir mein tum ho

mere KHwabon mein aate ho haqiqat mein nahin aate

nahin mere magar har KHwab ki ta'bir mein tum ho

tumhaare waste main ne kabhi likkha nahin kuchh bhi

magar jab paDh rahi hun to meri tahrir mein tum ho

hamesha mangti hun main tumhein apni du'aon mein

KHuda ka faisla ye hai meri taqdir mein tum ho