meri baat par jo chalte to kuchh aur baat hoti

mirī baat par jo chalte to kuchh aur baat hotī

jo ravish na tum badalte to kuchh aur baat hotī

rah-e-kā.enāt-e-ġham meñ mirā saath chhoḌnā kyā

mire saath saath chalte to kuchh aur baat hotī

pas-e-parda allah allah ye tajalliyoñ kā aalam

vo hijāb se nikalte to kuchh aur baat hotī

sar-e-hashr vo to kahiye unheñ dekh ke pareshāñ

jo bayāñ na ham badalte to kuchh aur baat hotī

ye charāġh-e-azm-o-himmat yuuñ jale bhī to jale kyā

agar āñdhiyoñ meñ jalte to kuchh aur baat hotī

jo piye haiñ maiñ ne aañsū vo badal ke apnī manzil

tirī aañkh se nikalte to kuchh aur baat hotī

vo nazar kī gardishoñ ko jo ba-nām-e-mai-gusārī

mire jaam se badalte to kuchh aur baat hotī

jo shuā-e-fikr-o-fan se mire vādī-e-adab meñ

na.e āftāb Dhalte to kuchh aur baat hotī

hameñ ai 'kamāl' āḳhir koī thā jo thā sañbhāle

hamīñ gir ke ḳhud sañbhalte to kuchh aur baat hotī

meri baat par jo chalte to kuchh aur baat hoti

jo rawish na tum badalte to kuchh aur baat hoti

rah-e-kaenat-e-gham mein mera sath chhoDna kya

mere sath sath chalte to kuchh aur baat hoti

pas-e-parda allah allah ye tajalliyon ka aalam

wo hijab se nikalte to kuchh aur baat hoti

sar-e-hashr wo to kahiye unhen dekh ke pareshan

jo bayan na hum badalte to kuchh aur baat hoti

ye charagh-e-azm-o-himmat yun jale bhi to jale kya

agar aandhiyon mein jalte to kuchh aur baat hoti

jo piye hain main ne aansu wo badal ke apni manzil

teri aankh se nikalte to kuchh aur baat hoti

wo nazar ki gardishon ko jo ba-nam-e-mai-gusari

mere jam se badalte to kuchh aur baat hoti

jo shua-e-fikr-o-fan se mere wadi-e-adab mein

nae aaftab Dhalte to kuchh aur baat hoti

hamein ai 'kamal' aaKHir koi tha jo tha sanbhaale

hamin gir ke KHud sanbhalte to kuchh aur baat hoti