meri chahaton ke sawal par koi muskura ke chala gaya

mirī chāhatoñ ke savāl par koī muskurā ke chalā gayā

mujhe phir se mausam-e-vasl kā vo hasīn ḳhvāb dikhā gayā

dil-e-mezbān meñ rañj kā yahī muddatoñ se hai silsila

koī din meñ aa ke Thahar gayā koī raat rah ke chalā gayā

vo milan kī avvalīñ sā.ateñ vo kisī kā lams ināyateñ

kabhī vo ḳhumār se tar huā kabhī mujh pe nashsha sā chhā gayā

yahī soch kar to maiñ dañg thā bhalā maiñ bhī kyā koī sañg thā

ki vo kār-e-ḳhair samajh ke yuuñ mujhe rāste se haTā gayā

ġham-e-āshiqī ho tirā bhalā tujhe yaad rakkhūñgā maiñ sadā

isī ek nām-e-vafā pe bas mujhe baar baar chhalā gayā

jinheñ rakkhā maiñ ne sambhāl kar jo the jaan se bhī azīz-tar

kabhī sail-e-ashk thā josh par vo unhī ḳhatoñ ko galā gayā

meri chahaton ke sawal par koi muskura ke chala gaya

mujhe phir se mausam-e-wasl ka wo hasin KHwab dikha gaya

dil-e-mezban mein ranj ka yahi muddaton se hai silsila

koi din mein aa ke Thahar gaya koi raat rah ke chala gaya

wo milan ki awwalin saaten wo kisi ka lams inayaten

kabhi wo KHumar se tar hua kabhi mujh pe nashsha sa chha gaya

yahi soch kar to main dang tha bhala main bhi kya koi sang tha

ki wo kar-e-KHair samajh ke yun mujhe raste se haTa gaya

gham-e-ashiqi ho tera bhala tujhe yaad rakkhunga main sada

isi ek nam-e-wafa pe bas mujhe bar bar chhala gaya

jinhen rakkha main ne sambhaal kar jo the jaan se bhi aziz-tar

kabhi sail-e-ashk tha josh par wo unhi KHaton ko gala gaya