meri chashm-e-shauq mein barha wo hazaron rang badal gae

mirī chashm-e-shauq meñ bārhā vo hazāroñ rang badal ga.e

maiñ fareb-e-husn na khā sakā vo kalīm the jo bahal ga.e

shab-e-ġham ġhalat ye ḳhayāl thā ki falak pe taare nikal ga.e

mujhe nā-murād sā dekh kar vo charāġh ghī ke the jal ga.e

tū agar hai tālib-e-dil-rubā to farotanī kā maza uThā

ye maqām-e-ishq hai dekhnā jo yahāñ gire vo sañbhal ga.e

haiñ junūñ-mizāj balā ke ham tū hamārā josh-e-junūñ na pūchh

kabhī chal ke arsh pe dam liyā kabhī us se duur nikal ga.e

unheñ dekhne ga.e jis ghaḌī kahā shart hai yahāñ be-ḳhudī

huī un kī diid to yuuñ huī ye ajiib chaal vo chal ga.e

maiñ ma.āl-e-husn-o-vafā pe kuchh nazar apnī Dālne jab lagā

na patang hī the na sham.a thī vo pighal ga.ī to vo jal ga.e

sar-e-bazm sun ke mirī ġhazal lage kahne jauhariyān-e-fan

ke mushā.ere meñ to 'zā.iq' aaj suḳhan ke la.al ugal ga.e

meri chashm-e-shauq mein barha wo hazaron rang badal gae

main fareb-e-husn na kha saka wo kalim the jo bahal gae

shab-e-gham ghalat ye KHayal tha ki falak pe tare nikal gae

mujhe na-murad sa dekh kar wo charagh ghi ke the jal gae

tu agar hai talib-e-dil-ruba to farotani ka maza uTha

ye maqam-e-ishq hai dekhna jo yahan gire wo sanbhal gae

hain junun-mizaj bala ke hum tu hamara josh-e-junun na puchh

kabhi chal ke arsh pe dam liya kabhi us se dur nikal gae

unhen dekhne gae jis ghaDi kaha shart hai yahan be-KHudi

hui un ki did to yun hui ye ajib chaal wo chal gae

main maal-e-husn-o-wafa pe kuchh nazar apni Dalne jab laga

na patang hi the na shama thi wo pighal gai to wo jal gae

sar-e-bazm sun ke meri ghazal lage kahne jauhariyan-e-fan

ke mushaere mein to 'zaiq' aaj suKHan ke lal ugal gae