meri dastan-e-alam to sun koi zalzala nahin aaega

mirī dāstān-e-alam to sun koī zalzala nahīñ aa.egā

mirā mudda.ā nahīñ aa.egā tirā tazkira nahīñ aa.egā

mirī zindagī ke alang meñ ka.ī ghāTiyāñ ka.ī moḌ haiñ

tirī vāpsī bhī huī agar tujhe rāsta nahīñ aa.egā

agar aa.e din tirī raah meñ tirī khoj meñ tirī chaah meñ

yūñhī qāfile jo luTā kiye koī qāfila nahīñ aa.egā

agar aa.e dasht meñ jhiil to mujhe ehtiyāt se pheñknā

ki maiñ barg-e-ḳhushk huuñ dosto mujhe Dūbnā nahīñ aa.egā

mirī umr bhar kī barahnagī mujhe chhoḌ de mire haal par

ye jo aks hai mirā ham-safar mujhe oḌhnā nahīñ aa.egā

kahīñ intihā kī malāmateñ kahīñ pattharoñ se aTī chhateñ

tire shahr meñ mire baad ab koī sar-phirā nahīñ aa.egā

koī intizār kā fā.eda mire yaar 'bedil-e-haidarī’

tujhe chhoḌ kar jo chalā gayā nahīñ aa.egā nahīñ aa.egā

meri dastan-e-alam to sun koi zalzala nahin aaega

mera muddaa nahin aaega tera tazkira nahin aaega

meri zindagi ke alang mein kai ghaTiyan kai moD hain

teri wapsi bhi hui agar tujhe rasta nahin aaega

agar aae din teri rah mein teri khoj mein teri chah mein

yunhi qafile jo luTa kiye koi qafila nahin aaega

agar aae dasht mein jhil to mujhe ehtiyat se phenkna

ki main barg-e-KHushk hun dosto mujhe Dubna nahin aaega

meri umr bhar ki barahnagi mujhe chhoD de mere haal par

ye jo aks hai mera ham-safar mujhe oDhna nahin aaega

kahin intiha ki malamaten kahin pattharon se aTi chhaten

tere shahr mein mere baad ab koi sar-phira nahin aaega

koi intizar ka faeda mere yar 'bedil-e-haidari’

tujhe chhoD kar jo chala gaya nahin aaega nahin aaega