meri diwangi ja kar ye sahraon mein kah aai

mirī dīvāngī jā kar ye sahrāoñ meñ kah aa.ī

tumhāre kaam aa.egī ye merī ābla-pā.ī

sabā shabnam gul-o-lāla nahīñ kaafī gulistāñ meñ

chahakne chahchahāne do to ham samjheñ bahār aa.ī

tumhāre bin sanam har pal baḌā suunā sā lagtā hai

tumhārī raah taktī hai mire jīvan kī añgnā.ī

sabā ke dosh par jaise kalī koī kahīñ chaTke

kisī nāzuk badan ne sub.h-dam yuuñ lī hai añgḌā.ī

zarā sā ik lihāz-e-ābrū-e-ishq hai varna

mujhe ab ḳhauf-e-duniyā hai na koī ḳhauf-e-rusvā.ī

jafāoñ par jafā.eñ vo kiye jaa.eñ magar 'sayyad'

chhalak saktā nahīñ merā kabhī jām-e-shakebā.ī

meri diwangi ja kar ye sahraon mein kah aai

tumhaare kaam aaegi ye meri aabla-pai

saba shabnam gul-o-lala nahin kafi gulistan mein

chahakne chahchahane do to hum samjhen bahaar aai

tumhaare bin sanam har pal baDa suna sa lagta hai

tumhaari rah takti hai mere jiwan ki angnai

saba ke dosh par jaise kali koi kahin chaTke

kisi nazuk badan ne subh-dam yun li hai angDai

zara sa ek lihaz-e-abru-e-ishq hai warna

mujhe ab KHauf-e-duniya hai na koi KHauf-e-ruswai

jafaon par jafaen wo kiye jaen magar 'sayyad'

chhalak sakta nahin mera kabhi jam-e-shakebai