meri diwangi ki had na puchho tum kahan tak hai

mirī dīvāngī kī had na pūchho tum kahāñ tak hai

zamīñ par huuñ magar merī rasā.ī lā-makāñ tak hai

tirā jalva to aise aam hai saare zamāne meñ

vahīñ tak dekh saktā hai nazar jis kī jahāñ tak hai

kisī ko kyā ḳhabar ehsās hai lekin mire dil ko

ki us ke pyaar kī barsāt mere dasht-e-jāñ tak hai

zarā barq-e-sitam se pūchh letā kaash koī ye

tire qahr-o-ġhazab kā silsila āḳhir kahāñ tak hai

hamīñ chubhte haiñ kyuuñ kāñToñ kī sūrat aañkh meñ terī

fasādī kā nishāna kyuuñ hamāre hī makāñ tak hai

tavajjoh ḳhaak ke zarroñ kī jānib kyuuñ kareñ 'afzal'

nazar apnī mah-o-parvīn tak hai kahkashāñ tak hai

meri diwangi ki had na puchho tum kahan tak hai

zamin par hun magar meri rasai la-makan tak hai

tera jalwa to aise aam hai sare zamane mein

wahin tak dekh sakta hai nazar jis ki jahan tak hai

kisi ko kya KHabar ehsas hai lekin mere dil ko

ki us ke pyar ki barsat mere dasht-e-jaan tak hai

zara barq-e-sitam se puchh leta kash koi ye

tere qahr-o-ghazab ka silsila aaKHir kahan tak hai

hamin chubhte hain kyun kanTon ki surat aankh mein teri

fasadi ka nishana kyun hamare hi makan tak hai

tawajjoh KHak ke zarron ki jaanib kyun karen 'afzal'

nazar apni mah-o-parwin tak hai kahkashan tak hai