مری دعاؤں کا یہ معجزہ لگے ہے مجھے

مری دعاؤں کا یہ معجزہ لگے ہے مجھے

فسون تیرہ شبی ٹوٹتا لگے ہے مجھے

گزر چکا ہوں کئی بار ان حصاروں سے

جہاں کی خاک بھی زنجیر پا لگے ہے مجھے

خوشی کے نام سے آنکھوں میں اشک آتے ہیں

غم حیات سے دل آشنا لگے ہے مجھے

تمام لوگ جو چونکے ہیں سن کے مقتل میں

وہ میری درد میں ڈوبی صدا لگے ہے مجھے

خبر نہیں تھی کہ ہر شخص تیز رو ہوگا

مری رفیق سفر اب انا لگے ہے مجھے

بچوں گا سنگ ملامت سے کس طرح انورؔ

اسی خیال سے اب خوف سا لگے ہے مجھے