meri duaon ka ye moajiza lage hai mujhe

mirī duāoñ kā ye mo.ajiza lage hai mujhe

fusūn-e-tīra-shabī TūTtā lage hai mujhe

guzar chukā huuñ ka.ī baar in hisāroñ se

jahāñ kī ḳhaak bhī zanjīr-e-pā lage hai mujhe

ḳhushī ke naam se āñkhoñ meñ ashk aate haiñ

ġham-e-hayāt se dil āshnā lage hai mujhe

tamām log jo chauñke haiñ sun ke maqtal meñ

vo merī dard meñ Duubī sadā lage hai mujhe

ḳhabar nahīñ thī ki har shaḳhs tez-rau hogā

mirī rafīq-e-safar ab anā lage hai mujhe

bachūñgā sang-e-malāmat se kis tarah 'anvar'

isī ḳhayāl se ab ḳhauf sā lage hai mujhe

meri duaon ka ye moajiza lage hai mujhe

fusun-e-tira-shabi TuTta lage hai mujhe

guzar chuka hun kai bar in hisaron se

jahan ki KHak bhi zanjir-e-pa lage hai mujhe

KHushi ke nam se aankhon mein ashk aate hain

gham-e-hayat se dil aashna lage hai mujhe

tamam log jo chaunke hain sun ke maqtal mein

wo meri dard mein Dubi sada lage hai mujhe

KHabar nahin thi ki har shaKHs tez-rau hoga

meri rafiq-e-safar ab ana lage hai mujhe

bachunga sang-e-malamat se kis tarah 'anwar'

isi KHayal se ab KHauf sa lage hai mujhe