meri ghazal jo nae saz se ibarat hai

mirī ġhazal jo na.e saaz se ibārat hai

mire nafas mirī āvāz se ibārat hai

khaTak rahā hai jo nashtar jarāhat-e-dil meñ

fareb-e-nargis-e-tannāz se ibārat hai

haqīqatoñ ko fasāna banā diyā jis ne

ye sehr bhī tire e.ajāz se ibārat hai

qafas bhī jaise darīcha hai dil ke zindāñ kā

nafas bhī lazzat-e-parvāz se ibārat hai

mire lahū kī ye gardish usī kā jaadū hai

ye harf-e-dil jo tire raaz se ibārat hai

jahān-o-jāñ kā sitam aarzū kā lutf-o-karam

tirī adā se tire naaz se ibārat hai

na aa sakā mire ash.ār meñ 'salīm' kā rañg

jo us ke munfarid andāz se ibārat hai

meri ghazal jo nae saz se ibarat hai

mere nafas meri aawaz se ibarat hai

khaTak raha hai jo nashtar jarahat-e-dil mein

fareb-e-nargis-e-tannaz se ibarat hai

haqiqaton ko fasana bana diya jis ne

ye sehr bhi tere eajaz se ibarat hai

qafas bhi jaise daricha hai dil ke zindan ka

nafas bhi lazzat-e-parwaz se ibarat hai

mere lahu ki ye gardish usi ka jadu hai

ye harf-e-dil jo tere raaz se ibarat hai

jahan-o-jaan ka sitam aarzu ka lutf-o-karam

teri ada se tere naz se ibarat hai

na aa saka mere ashaar mein 'salim' ka rang

jo us ke munfarid andaz se ibarat hai