مری غزل کی صباحت کو خد و خال تو دے

مری غزل کی صباحت کو خد و خال تو دے

اور اس خیال کو آئینۂ جمال تو دے

کہیں نہ کر دے اسے غرق زور طوفاں کا

بھنور سے کشتئ دل نا خدا نکال تو دے

غزل کی شان بھی رہ جائے اور میری بھی

مرا مزاج اچھوتا سا اک خیال تو دے

شعور و فکر کی رعنائیوں میں کھو جاؤں

خیال ماضی کو آشفتگیٔ حال تو دے

میں امتحان وفا سے بھی سرخ رو نکلوں

سوال نامے میں ایسا کوئی سوال تو دے

غم زمانہ غم آرزو غم حسرتؔ

مری حیات کو کچھ اور ماہ و سال تو دے