مری ہنسی میں مرے آنسوؤں میں رہتا ہے

مری ہنسی میں مرے آنسوؤں میں رہتا ہے

وہ روح بن کے مری دھڑکنوں میں رہتا ہے

میں بچپنے میں جسے دیکھ کر ہمکتا تھا

وہ چاند آج مرے بازوؤں میں رہتا ہے

خلاف شرع نہ ہو جائے کوئی کام کہیں

ہمیشہ خوف ہمارے دلوں میں رہتا ہے

یہ جانتے ہی نہیں تیری عظمتیں مولیٰ

یہ سوچتے ہیں خدا مسجدوں میں رہتا ہے

تمہیں بھی لگ گئی شہرت کی چاشنی شاید

تمہارا نام بہت سرخیوں میں رہتا ہے

ثمرؔ کو پوچھ رہے ہو تمہیں نہیں معلوم

وہ شہر چھوڑ کے اب جنگلوں میں رہتا ہے