مری ہر گفتگو توحید کی ہے

مری ہر گفتگو توحید کی ہے

سو میں نے عشق کی تائید کی ہے

کبھی گزرے ہو کیا تم کربلا سے

کبھی شبیر کی تقلید کی ہے

یہاں جو روشنی ہے چار جانب

سناں پر بولتے خورشید کی ہے

لہو کا رنگ ڈالا ہے غزل میں

دروں کے سوز کی تجدید کی ہے

حسد سے زنگ لگتا ہے دلوں کو

یہی اک دوست نے تاکید کی ہے

جسے مجھ سے محبت ہی نہیں تھی

اسی نے خیر سے تردید کی ہے

خزاں کا درد سینے سے لگا کر

وصال یار کی امید کی ہے

صہیبؔ ایسی خبر نے آ لیا ہے

کہ میں نے نظم میں تجرید کی ہے