meri har guftugu tauhid ki hai

mirī har guftugū tauhīd kī hai

so maiñ ne ishq kī tā.īd kī hai

kabhī guzre ho kyā tum karbalā se

kabhī shabbīr kī taqlīd kī hai

yahāñ jo raushnī hai chaar jānib

sināñ par bolte ḳhurshīd kī hai

lahū kā rang Daalā hai ġhazal meñ

darūñ ke soz kī tajdīd kī hai

hasad se zang lagtā hai diloñ ko

yahī ik dost ne tākīd kī hai

jise mujh se mohabbat hī nahīñ thī

usī ne ḳhair se tardīd kī hai

ḳhizāñ kā dard siine se lagā kar

visāl-e-yār kī ummīd kī hai

'suhaib' aisī ḳhabar ne aa liyā hai

ki maiñ ne nazm meñ tajrīd kī hai

meri har guftugu tauhid ki hai

so main ne ishq ki taid ki hai

kabhi guzre ho kya tum karbala se

kabhi shabbir ki taqlid ki hai

yahan jo raushni hai chaar jaanib

sinan par bolte KHurshid ki hai

lahu ka rang Dala hai ghazal mein

darun ke soz ki tajdid ki hai

hasad se zang lagta hai dilon ko

yahi ek dost ne takid ki hai

jise mujh se mohabbat hi nahin thi

usi ne KHair se tardid ki hai

KHizan ka dard sine se laga kar

visal-e-yar ki ummid ki hai

'suhaib' aisi KHabar ne aa liya hai

ki main ne nazm mein tajrid ki hai