meri hasti ka jalwon mein tere ru-posh ho jaana

mirī hastī kā jalvoñ meñ tire rū-posh ho jaanā

yahīñ to hai bas ik qatra kā dariyā-nosh ho jaanā

tumheñ kyā ġham mubārak ho tumheñ rū-posh ho jaanā

huā jaatā hai afsāna mirā behosh ho jaanā

vahī samjhe haiñ kuchh kuchh zindagī-o-maut kā hāsil

jinheñ aatā hai jiite jī kafan bar-dosh ho jaanā

ye achchhī ibtidā kī aap ne ai hazrat-e-mūsā

dam-e-dīdār ab lāzim huā behosh ho jaanā

zamīñ kā zarra zarra ā.ina-dār-e-haqīqat hai

kahīñ apne hī jalvoñ meñ na tum rū-posh ho jaanā

bisāt-e-dahr meñ ġhāfil bhalā jiine kā hāsil kyā

ki marnā bhī jahāñ par ho vabāl-e-dosh ho jaanā

vo sar zaanū pe un ke vo havā zulf-e-mo.ambar kī

hameñ to hosh se baḌh kar hai yuuñ behosh ho jaanā

nazar aate haiñ ab jalve hī jalve har taraf mujh ko

dalīl-e-hoshiyārī thā mirā behosh ho jaanā

vo uThnā jalva-gāh-e-nāz ke parde kā nazroñ se

vo merā dekhte hī dekhte behosh ho jaanā

kahīñ nākām rah jaa.e na zauq-e-justujū apnā

adam se bhī ḳhayāl-e-yār ham-āġhosh ho jaanā

guzar jā manzil-e-ehsās kī had se bhī ai 'afqar'

kamāl-e-be-ḳhudī hai be-niyāz-e-hosh ho jaanā

meri hasti ka jalwon mein tere ru-posh ho jaana

yahin to hai bas ek qatra ka dariya-nosh ho jaana

tumhein kya gham mubarak ho tumhein ru-posh ho jaana

hua jata hai afsana mera behosh ho jaana

wahi samjhe hain kuchh kuchh zindagi-o-maut ka hasil

jinhen aata hai jite ji kafan bar-dosh ho jaana

ye achchhi ibtida ki aap ne ai hazrat-e-musa

dam-e-didar ab lazim hua behosh ho jaana

zamin ka zarra zarra aaina-dar-e-haqiqat hai

kahin apne hi jalwon mein na tum ru-posh ho jaana

bisat-e-dahr mein ghafil bhala jine ka hasil kya

ki marna bhi jahan par ho wabaal-e-dosh ho jaana

wo sar zanu pe un ke wo hawa zulf-e-moambar ki

hamein to hosh se baDh kar hai yun behosh ho jaana

nazar aate hain ab jalwe hi jalwe har taraf mujh ko

dalil-e-hoshiyari tha mera behosh ho jaana

wo uThna jalwa-gah-e-naz ke parde ka nazron se

wo mera dekhte hi dekhte behosh ho jaana

kahin nakaam rah jae na zauq-e-justuju apna

adam se bhi KHayal-e-yar ham-aghosh ho jaana

guzar ja manzil-e-ehsas ki had se bhi ai 'afqar'

kamal-e-be-KHudi hai be-niyaz-e-hosh ho jaana