meri hasti saza hone se pahle

mirī hastī sazā hone se pahle

maiñ mar jaatā baḌā hone se pahle

hamāre saath uThtā baiThtā thā

vo ik banda ḳhudā hone se pahle

vo qibla is galī se jā chukā thā

namāz-e-dil adā hone se pahle

mohabbat ik musalsal hādisa thī

hamāre be-vafā hone se pahle

maiñ apnī zaat se nā-āshnā thā

ḳhudā se āshnā hone se pahle

ḳhizāñ meñ phuul sā lagtā thā mujh ko

vo patthar aa.inā hone se pahle

bahut mazbūt sī dīvār thā maiñ

kisī kā rāstā hone se pahle

meri hasti saza hone se pahle

main mar jata baDa hone se pahle

hamare sath uThta baiThta tha

wo ek banda KHuda hone se pahle

wo qibla is gali se ja chuka tha

namaz-e-dil ada hone se pahle

mohabbat ek musalsal hadisa thi

hamare be-wafa hone se pahle

main apni zat se na-ashna tha

KHuda se aashna hone se pahle

KHizan mein phul sa lagta tha mujh ko

wo patthar aaina hone se pahle

bahut mazbut si diwar tha main

kisi ka rasta hone se pahle