meri iltija se KHafa na ho ki wo josh-e-dil tha gila na tha

mirī iltijā se ḳhafā na ho ki vo josh-e-dil thā gila na thā

kabhī ranj maiñ ne sahā na thā kabhī dil kisī ko diyā na thā

mire hāthoñ mujh ko alam mile ye maiñ kyoñ kahūñ ki ḳhudā na thā

mirā ka.aba thā haram-e-butāñ mirā qibla qibla-numā na thā

tirī ehtiyāt-e-nigāh se tire iltifāt-e-nigāh tak

mirā haal laakh burā sahī magar is qadar bhī burā na thā

ba-hazār ishva-e-jāñ-sitāñ vo phir apnā jalva dikhā ga.e

abhī aag dil kī dabī na thī abhī zaḳhm dil kā bharā na thā

mire dard-e-dil kā vo mājrā mire rang-e-ruḳh se ayaañ huā

jo kisī se maiñ ne kahā na thā jo kisī ne mujh se sunā na thā

ye maiñ kyoñ kahūñ mirā dil gayā ki fuġhāñ se arsh to hil gayā

mujhe intizār meñ mil gayā tire vasl meñ jo mazā na thā

vo niyāz-e-ishq kī sāzisheñ vo ġhurūr-e-husn kī nāzisheñ

mujhe e'timād-e-sitam na thā unheñ aitabār-e-vafā na thā

ye batā ki 'bāsit'-e-ḳhasta ko tirī bazm-e-nāz se kyā milā

abhī dil-ba-dast gayā thā vo abhī haath dil se judā na thā

meri iltija se KHafa na ho ki wo josh-e-dil tha gila na tha

kabhi ranj main ne saha na tha kabhi dil kisi ko diya na tha

mere hathon mujh ko alam mile ye main kyon kahun ki KHuda na tha

mera kaba tha haram-e-butan mera qibla qibla-numa na tha

teri ehtiyat-e-nigah se tere iltifat-e-nigah tak

mera haal lakh bura sahi magar is qadar bhi bura na tha

ba-hazar ishwa-e-jaan-sitan wo phir apna jalwa dikha gae

abhi aag dil ki dabi na thi abhi zaKHm dil ka bhara na tha

mere dard-e-dil ka wo majra mere rang-e-ruKH se ayan hua

jo kisi se main ne kaha na tha jo kisi ne mujh se suna na tha

ye main kyon kahun mera dil gaya ki fughan se arsh to hil gaya

mujhe intizar mein mil gaya tere wasl mein jo maza na tha

wo niyaz-e-ishq ki sazishen wo ghurur-e-husn ki nazishen

mujhe e'timad-e-sitam na tha unhen aitabar-e-wafa na tha

ye bata ki 'basit'-e-KHasta ko teri bazm-e-naz se kya mila

abhi dil-ba-dast gaya tha wo abhi hath dil se juda na tha