meri kahani ke kirdar sans lete hain

mirī kahānī ke kirdār saañs lete haiñ

maiñ saañs luuñ to mire yaar saañs lete haiñ

ham ek dasht meñ dete haiñ zindagī kī naved

hamāre siine meñ āzār saañs lete haiñ

kabhī to vaqt kī gardish thakā bhī detī hai

so thaam kar tirī dīvār saañs lete haiñ

ukhaḌne lagtī haiñ sāñseñ ulajh ke sāñsoñ se

phir is ke ba.ad lagātār saañs lete haiñ

ye vāhime se mire dil meñ be-sabab to nahīñ

tirī ḳhamoshī meñ inkār saañs lete haiñ

ḳhutūt phaTne lage miT ga.ī haiñ tahrīreñ

sunā.ī dete haiñ afkār saañs lete haiñ

kahānī-kār ne inkār hī dikhāyā hai

tamām lafzoñ meñ iz.hār saañs lete haiñ

jo chhū ke dekhiye to zindagī nahīñ miltī

'zubair' kis liye be-kār saañs lete haiñ

meri kahani ke kirdar sans lete hain

main sans lun to mere yar sans lete hain

hum ek dasht mein dete hain zindagi ki nawed

hamare sine mein aazar sans lete hain

kabhi to waqt ki gardish thaka bhi deti hai

so tham kar teri diwar sans lete hain

ukhaDne lagti hain sansen ulajh ke sanson se

phir is ke baad lagatar sans lete hain

ye wahime se mere dil mein be-sabab to nahin

teri KHamoshi mein inkar sans lete hain

KHutut phaTne lage miT gai hain tahriren

sunai dete hain afkar sans lete hain

kahani-kar ne inkar hi dikhaya hai

tamam lafzon mein izhaar sans lete hain

jo chhu ke dekhiye to zindagi nahin milti

'zubair' kis liye be-kar sans lete hain