meri kashti-e-mohabbat yunhi pa gai kinara

mirī kashtī-e-mohabbat yūñhī pā ga.ī kinārā

kisī mauj ne Duboyā kisī mauj ne ubhārā

bahut aasrā lagā kar baḌe pyaar se pukārā

tumhīñ sāmne na aa.e tumhīñ kar ga.e kinārā

koī talḳhi-e-mohabbat ko na kar sakā gavārā

ye to sirf merā dil thā ki ye ban gayā tumhārā

mire pyaar se na khelo mirā zaḳhm-e-dil na chheḌo

kahīñ jal na jaa.e dāman mirī aah se tumhārā

na malāl ho kisī ko mirī fat.h-mandiyoñ se

mirī chaal hī na.ī thī maiñ yahī samajh ke haarā

na haram se koī raġhbat na sanam-kade se nisbat

ye hai aadmī kī duniyā mujhe aadmī hai pyārā

mire kaam aa.ī āḳhir mirī himmat-āzmā.ī

jise kah rahe the tūfāñ vahī ban gayā kinārā

ye hai nekiyoñ kā badla ki hai apnī kam-nasībī

vahī dushman-e-sukūñ hai jise de diyā sahārā

na.e naqsh zindagī ke ubhar aa.e pattharoñ se

tirī chashm-e-fitnagar ne kiyā jab kabhī ishāra

meri kashti-e-mohabbat yunhi pa gai kinara

kisi mauj ne Duboya kisi mauj ne ubhaara

bahut aasra laga kar baDe pyar se pukara

tumhin samne na aae tumhin kar gae kinara

koi talKHi-e-mohabbat ko na kar saka gawara

ye to sirf mera dil tha ki ye ban gaya tumhaara

mere pyar se na khelo mera zaKHm-e-dil na chheDo

kahin jal na jae daman meri aah se tumhaara

na malal ho kisi ko meri fath-mandiyon se

meri chaal hi nai thi main yahi samajh ke haara

na haram se koi raghbat na sanam-kade se nisbat

ye hai aadmi ki duniya mujhe aadmi hai pyara

mere kaam aai aaKHir meri himmat-azmai

jise kah rahe the tufan wahi ban gaya kinara

ye hai nekiyon ka badla ki hai apni kam-nasibi

wahi dushman-e-sukun hai jise de diya sahaara

nae naqsh zindagi ke ubhar aae pattharon se

teri chashm-e-fitnagar ne kiya jab kabhi ishaara