meri KHak nur hi nur hai ki harif-e-jalwa-e-tur hai

mirī ḳhaak nuur hī nuur hai ki harīf-e-jalva-e-tūr hai

dil-e-be-qarār meñ tū ne kyā ye charāġh-e-ishq jalā diyā

mujhe fikr-e-daur-e-ḳhizāñ ho kyā ki maiñ nā-shanās-e-bahār huuñ

ġham-e-dil kā shukr-guzār huuñ mujhe dars-e-zīst sikhā diyā

hai natīja-ḳhez mirī fuġhāñ ki ye dil-jaloñ kī hai dāstāñ

kareñ anjuman meñ agar bayāñ to jahāñ meñ hashr uThā diyā

jo jahāñ meñ naqsh-e-jamīl hai tirī shoḳhiyoñ kā qatīl hai

ye to khel-e-rabb-e-jalīl hai ki banā ke ḳhud hī miTā diyā

jise ishq kahte haiñ haq-nigar mirī ḳhalvatoñ kā hai chārāgar

kisī dil ke saaz ko chheḌ kar koī naġhma us ne sunā diyā

ho ḳhamosh ab to fasāna-ḳhvāñ nahīñ achchhā sabr kā imtihāñ

ki sunā ke dard kī dāstāñ kisī ġham-zada ko rulā diyā

maiñ huuñ ek ‘sā.ib’-e-be-navā mirā dil hai kitnā bujhā huā

jo kabhī thā maiñ ne sunā huā tire ishq ne vo dikhā diyā

meri KHak nur hi nur hai ki harif-e-jalwa-e-tur hai

dil-e-be-qarar mein tu ne kya ye charagh-e-ishq jala diya

mujhe fikr-e-daur-e-KHizan ho kya ki main na-shanas-e-bahaar hun

gham-e-dil ka shukr-guzar hun mujhe dars-e-zist sikha diya

hai natija-KHez meri fughan ki ye dil-jalon ki hai dastan

karen anjuman mein agar bayan to jahan mein hashr uTha diya

jo jahan mein naqsh-e-jamil hai teri shoKHiyon ka qatil hai

ye to khel-e-rabb-e-jalil hai ki bana ke KHud hi miTa diya

jise ishq kahte hain haq-nigar meri KHalwaton ka hai chaaragar

kisi dil ke saz ko chheD kar koi naghma us ne suna diya

ho KHamosh ab to fasana-KHwan nahin achchha sabr ka imtihan

ki suna ke dard ki dastan kisi gham-zada ko rula diya

main hun ek ‘saib’-e-be-nawa mera dil hai kitna bujha hua

jo kabhi tha main ne suna hua tere ishq ne wo dikha diya