meri KHatir koi nama koi paigham to ho

mirī ḳhātir koī naama koī paiġhām to ho

dil-e-muztar ko kisī taur se ārām to ho

mujh se āvāra ko mil jaa.e magar jā-e-amāñ

aarzū hai tire kūche meñ kabhī shaam to ho

mauj-e-ḳhūñ sar se guzar jaa.e to kuchh baat bane

aaj zindāñ meñ bhī taz.īn-e-dar-o-bām to ho

tapte sahrā meñ bhī saaya kahīñ mil jā.egā

pahle ai dost tujhe jur.at-e-yak-gām to ho

be-gunāhī kā mire qatl pe charchā hogā

koī bohtān tarāsho koī ilzām to ho

gar tirā lutf nahīñ terā taġhāful hī sahī

āḳhirash merī vafā kā koī in.aam to ho

uñgliyāñ uThtī haiñ jis samt bhī jaate ho 'habāb'

na sahī kuchh magar ik shā.ir-e-badnām to ho

meri KHatir koi nama koi paigham to ho

dil-e-muztar ko kisi taur se aaram to ho

mujh se aawara ko mil jae magar ja-e-aman

aarzu hai tere kuche mein kabhi sham to ho

mauj-e-KHun sar se guzar jae to kuchh baat bane

aaj zindan mein bhi tazin-e-dar-o-baam to ho

tapte sahra mein bhi saya kahin mil jaega

pahle ai dost tujhe jurat-e-yak-gam to ho

be-gunahi ka mere qatl pe charcha hoga

koi bohtan tarasho koi ilzam to ho

gar tera lutf nahin tera taghaful hi sahi

aaKHirash meri wafa ka koi inam to ho

ungliyan uThti hain jis samt bhi jate ho 'habab'

na sahi kuchh magar ek shair-e-badnam to ho