meri KHatir mein saqi kab tera paimana aata hai

mirī ḳhātir meñ saaqī kab tirā paimāna aatā hai

ki yaañ har-dam ḳhayāl-e-nargis-e-mastāna aatā hai

Thikāne justujū-e-yār meñ kis kis ke chhūTe haiñ

ki bulbul baaġh meñ aur bazm meñ parvāna aatā hai

shab-e-furqat uThā kar fitna-e-mahshar se kahtī hai

mujhe zulf-e-darāz-e-yār kā afsāna aatā hai

nikal kar aañkh se ġhā.eb nahīñ hote haiñ ye aañsū

isī paanī se bhartā umr kā paimāna aatā hai

ilāhī log kyuuñ ho ho ke ḳhush firdaus jaate haiñ

magar is baaġh se aage koī vīrāna aatā hai

dil-e-zār aur shast-e-yār meñ ik raah hai maḳhfī

ḳhatā ho kar bhī sīdhā nāvak-e-jānāna aatā hai

chalā huuñ ghar se uTh kar ka.abe kī jānib magar mujh ko

taraddud hai ki raste meñ mire mai-ḳhāna aatā hai

mujhe gardish meñ paayā daur-e-charḳh-e-barīñ kaahe

ki mere saath chakkar meñ mirā kāshāna aatā hai

ye raġhbat hai use aġhyār se jab sher kahtā hai

to mazmūñ bhī ḳhayāl-e-yār meñ begāna aatā hai

tire kūche meñ ho jaatā hai kyā insān par jaadū

abhī hushiyār jaatā hai abhī dīvāna aatā hai

gayā jo is ḳham-e-gesū meñ vaañ kā ho rahā 'sālik'

ye hairat hai salāmat kyuuñ ki phir kar shāna aatā hai

meri KHatir mein saqi kab tera paimana aata hai

ki yan har-dam KHayal-e-nargis-e-mastana aata hai

Thikane justuju-e-yar mein kis kis ke chhuTe hain

ki bulbul bagh mein aur bazm mein parwana aata hai

shab-e-furqat uTha kar fitna-e-mahshar se kahti hai

mujhe zulf-e-daraaz-e-yar ka afsana aata hai

nikal kar aankh se ghaeb nahin hote hain ye aansu

isi pani se bharta umr ka paimana aata hai

ilahi log kyun ho ho ke KHush firdaus jate hain

magar is bagh se aage koi virana aata hai

dil-e-zar aur shast-e-yar mein ek rah hai maKHfi

KHata ho kar bhi sidha nawak-e-jaanana aata hai

chala hun ghar se uTh kar kabe ki jaanib magar mujh ko

taraddud hai ki raste mein mere mai-KHana aata hai

mujhe gardish mein paya daur-e-charKH-e-barin kahe

ki mere sath chakkar mein mera kashana aata hai

ye raghbat hai use aghyar se jab sher kahta hai

to mazmun bhi KHayal-e-yar mein begana aata hai

tere kuche mein ho jata hai kya insan par jadu

abhi hushiyar jata hai abhi diwana aata hai

gaya jo is KHam-e-gesu mein wan ka ho raha 'salik'

ye hairat hai salamat kyun ki phir kar shana aata hai