meri KHushbu mere asrar tujh mein

mirī ḳhushbū mire asrār tujh meñ

maiñ shāmil huuñ jamāl-e-yār tujh meñ

masīhā.ī ko jis kī ishq aayā

koī aisā paḌā bīmār tujh meñ

ġhubār-e-zāt baiThegā koī dam

girī hai āḳhirī dīvār tujh meñ

fusūn-e-shab bhī hai qurbān jis par

suḳhan aisā huā bedār tujh meñ

havā-e-tund hai jalte diye haiñ

azal se barsar-e-paikār tujh meñ

tujhe hai aarzū duniyā kī lekin

koī duniyā se hai bezār tujh meñ

milan ke giit gaatī hai azal se

mirī pāzeb kī jhankār tujh meñ

maiñ huuñ vo shabd jo mādūm hotā

agar paatā nahīñ iz.hār tujh meñ

izāfī haiñ mujhe ye dīn-o-duniyā

mire donoñ jahāñ dildār tujh meñ

meri KHushbu mere asrar tujh mein

main shamil hun jamal-e-yar tujh mein

masihai ko jis ki ishq aaya

koi aisa paDa bimar tujh mein

ghubar-e-zat baiThega koi dam

giri hai aaKHiri diwar tujh mein

fusun-e-shab bhi hai qurban jis par

suKHan aisa hua bedar tujh mein

hawa-e-tund hai jalte diye hain

azal se barsar-e-paikar tujh mein

tujhe hai aarzu duniya ki lekin

koi duniya se hai bezar tujh mein

milan ke git gati hai azal se

meri pazeb ki jhankar tujh mein

main hun wo shabd jo madum hota

agar pata nahin izhaar tujh mein

izafi hain mujhe ye din-o-duniya

mere donon jahan dildar tujh mein