مری مجبوریاں تھیں کچھ خفا ہونا نہیں تھا

مری مجبوریاں تھیں کچھ خفا ہونا نہیں تھا

تمہارا قرض مجھ سے اب ادا ہونا نہیں تھا

ہمارے ہاتھ میں لرزش کبھی ہوتی نہیں ہے

نشانہ باندھ لیتے تو خطا ہونا نہیں تھا

اگر تنہا مجھے یوں چھوڑ کر جاتے نہیں تم

ہنر یہ شعر کا مجھ کو عطا ہونا نہیں تھا

تمہاری فیصلہ سازی تھی کچھ کمزور ورنہ

ستاروں میں یہ لکھا ہے جدا ہونا نہیں تھا

ابھی کچھ روز عدت میں گزاریں گے تمہاری

ابھی ویسے بھی ہم سے کچھ بڑا ہونا نہیں تھا