meri nawa meri tadbir tak nahin pahunchi

mirī navā mirī tadbīr tak nahīñ pahuñchī

ye mere ḳhvāb kī ta.abīr tak nahīñ pahuñchī

tire jamāl kā partav aziiz hai lekin

tirī adā tirī tasvīr tak nahīñ pahuñchī

yahī bahut hai ki ham manziloñ se ho aa.e

hamārī kaj-ravī tāḳhīr tak nahīñ pahuñchī

kamāñ se kaisī shikāyat ki vo hai nā-bīnā

hadaf kī be-nigahī tiir tak nahīñ pahuñchī

hamāre dil se uThī hausla-shikan āvāz

magar ye paañv kī zanjīr tak nahīñ pahuñchī

sisak rahī hai jo dahlīz-ḳhāna meñ dīmak

hazār shukr ki shahtīr tak nahīñ pahuñchī

havā meñ uThte rahe haath be-sabab 'mohsin'

chamak duāoñ kī tāsīr tak nahīñ pahuñchī

meri nawa meri tadbir tak nahin pahunchi

ye mere KHwab ki tabir tak nahin pahunchi

tere jamal ka partaw aziz hai lekin

teri ada teri taswir tak nahin pahunchi

yahi bahut hai ki hum manzilon se ho aae

hamari kaj-rawi taKHir tak nahin pahunchi

kaman se kaisi shikayat ki wo hai na-bina

hadaf ki be-nigahi tir tak nahin pahunchi

hamare dil se uThi hausla-shikan aawaz

magar ye panw ki zanjir tak nahin pahunchi

sisak rahi hai jo dahliz-KHana mein dimak

hazar shukr ki shahtir tak nahin pahunchi

hawa mein uThte rahe hath be-sabab 'mohsin'

chamak duaon ki tasir tak nahin pahunchi