meri nazron mein duniya thi magar andar thi tanhai

mirī nazroñ meñ duniyā thī magar andar thī tanhā.ī

sar-e-manzar thā hangāma pas-e-manzar thī tanhā.ī

paḌhī thī mai-kadoñ ke shor kī har dāstāñ ham ne

magar is shor meñ paivast fitna-gar thī tanhā.ī

havā.eñ ḳhush-gumānī kī bulāne aa.iiñ thiiñ lekin

udāsī paañv jakḌe thī shikasta-par thī tanhā.ī

sajī thī ḳhāna-e-dil kī har ik dīvār yādoñ se

bahut pur-soz se lahje meñ naġhma-gar thī tanhā.ī

ḳhizāñ-ālūd shāḳhoñ par parinde bhī nahīñ aa.e

isī be-sā.ebānī meñ barahna-sar thī tanhā.ī

mire nazdīk sab chehroñ pe ḳhushiyāñ thiiñ ta'alluq thā

magar āñkhoñ kī tah meñ vasvasoñ se tar thī tanhā.ī

junūñ thā vahshateñ thiiñ ābla-pā.ī thī hasrat thī

'hinā' dasht-e-mohabbat meñ bahut muztar thī tanhā.ī

meri nazron mein duniya thi magar andar thi tanhai

sar-e-manzar tha hangama pas-e-manzar thi tanhai

paDhi thi mai-kadon ke shor ki har dastan hum ne

magar is shor mein paiwast fitna-gar thi tanhai

hawaen KHush-gumani ki bulane aain thin lekin

udasi panw jakDe thi shikasta-par thi tanhai

saji thi KHana-e-dil ki har ek diwar yaadon se

bahut pur-soz se lahje mein naghma-gar thi tanhai

KHizan-alud shaKHon par parinde bhi nahin aae

isi be-saebani mein barahna-sar thi tanhai

mere nazdik sab chehron pe KHushiyan thin ta'alluq tha

magar aankhon ki tah mein waswason se tar thi tanhai

junun tha wahshaten thin aabla-pai thi hasrat thi

'hina' dasht-e-mohabbat mein bahut muztar thi tanhai