meri nigah ki kirnon se jab naha jae

mirī nigāh kī kirnoñ se jab nahā jaa.e

tum us ko dekho to bas dekhte rahā jaa.e

kisī ke ġham ke sahāre hī jī liyā jaa.e

jo ye bhī paas na hove to kyā kiyā jaa.e

tumhāre hoñToñ pe taale mirī zabān pe muhr

chalo latā kā koī giit hī sunā jaa.e

ye peḌ bāñjh hai mā'lūm hai hameñ lekin

jo phal nahīñ haiñ to phir phuul hī chunā jaa.e

haqīqatoñ se to din raat paalā paḌtā hai

kabhī kabhī koī afsāna bhī sunā jaa.e

na mar hī jaatā hai vo aur na jī hī paatā hai

'ajīb shaḳhs hai bas sūkhtā chalā jaa.e

ye baḌhte log ye sukḌā huā hayāt kā ghar

kaho ki ab ke kisī aur ghar ḳhudā jaa.e

kabhī to utre koī dil ke suune āñgan meñ

pighaltī āñkhoñ meñ ik ḳhvāb to samā jaa.e

bulandiyoñ pe to ik 'umr kaaT dī maiñ ne

kabhī kabhī kisī pastī meñ bhī girā jaa.e

har ek aañkh pighaltī hī jaatī hai 'badnām'

har ek chehra dhuāñ hī dhuāñ huā jaa.e

meri nigah ki kirnon se jab naha jae

tum us ko dekho to bas dekhte raha jae

kisi ke gham ke sahaare hi ji liya jae

jo ye bhi pas na howe to kya kiya jae

tumhaare honTon pe tale meri zaban pe muhr

chalo lata ka koi git hi suna jae

ye peD banjh hai ma'lum hai hamein lekin

jo phal nahin hain to phir phul hi chuna jae

haqiqaton se to din raat pala paDta hai

kabhi kabhi koi afsana bhi suna jae

na mar hi jata hai wo aur na ji hi pata hai

'ajib shaKHs hai bas sukhta chala jae

ye baDhte log ye sukDa hua hayat ka ghar

kaho ki ab ke kisi aur ghar KHuda jae

kabhi to utre koi dil ke sune aangan mein

pighalti aankhon mein ek KHwab to sama jae

bulandiyon pe to ek 'umr kaT di main ne

kabhi kabhi kisi pasti mein bhi gira jae

har ek aankh pighalti hi jati hai 'badnam'

har ek chehra dhuan hi dhuan hua jae