مری نگاہ میں یہ چرخ اخضری کیا ہے

مری نگاہ میں یہ چرخ اخضری کیا ہے

یہ مہر و ماہ یہ تاروں کی رہبری کیا ہے

یہ ناز و عشوہ و تیوری ستم گری کیا ہے

تڑپ نہ جائے اگر دل تو دلبری کیا ہے

بنائیں آپ مرے دل کو آئنہ لیکن

سمجھ تو لیجئے پہلے سکندری کیا ہے

وفائیں ہو گئیں قربان ان جفاؤں پر

تمہی بتاؤ یہ انداز دلبری کیا ہے

یوں بزم ناز میں آنے کے ہم نہیں قائل

نہ ہو سلام محبت تو حاضری کیا ہے

نگاہ ناز کا کشتہ ہوا جب اول شب

مری نظر میں یہ جادوئے سامری کیا ہے

جناب شیخ بھی بیٹھے تھے بت کدہ میں کل

بحث چھڑی تھی انہی سے کہ کافری کیا ہے

عمل نہیں تو یہ القاب سب ہیں ناکارہ

یہ شیخ و سید و افغان و جعفری کیا ہے

نکالتے ہیں مجھے بزم اہل سخناں سے

خبر نہیں جنہیں آداب شاعری کیا ہے

نہ قدر لعل نہ کچھ آبروئے گوہر ہے

بدوں تمیز گہر زعم جوہری کیا ہے

یہ اہل بزم کا حسن سماعت ہے دیوانؔ

وگرنہ اہل زباں میں یہ شاعری کیا ہے