meri nigah nai aab-o-tab dekhti hai

mirī nigāh na.ī āb-o-tāb dekhtī hai

kabhī sitāra kabhī māhtāb dekhtī hai

maiñ us kī niiñd se dil meñ utarnā chāhtā huuñ

ḳhudā kā shukr ki vo laḌkī ḳhvāb dekhtī hai

zamīñ pe aa ke ye ḳhalq-e-ḳhudā ba-nām-e-ḳhudā

ḳharāb ho ke jahān-e-ḳharāb dekhtī hai

faqat mujhe hī vo dariyā nazar nahīñ aatā

ki reg-e-sahrā bhī aksar sarāb dekhtī hai

bashar ko ḳhvāb dikhātī hai aur ḳhvāboñ meñ

ḳhudā kī aañkh nayā inqilāb dekhtī hai

qalam davāt mire muntazir haiñ muddat se

kitāb uThā.ūñ ki mujh ko kitāb dekhtī hai

kabhī chalī nahīñ 'zahrāb' vo havā mujh meñ

jo shāḳh shāḳh mahakte gulāb dekhtī hai

meri nigah nai aab-o-tab dekhti hai

kabhi sitara kabhi mahtab dekhti hai

main us ki nind se dil mein utarna chahta hun

KHuda ka shukr ki wo laDki KHwab dekhti hai

zamin pe aa ke ye KHalq-e-KHuda ba-nam-e-KHuda

KHarab ho ke jahan-e-KHarab dekhti hai

faqat mujhe hi wo dariya nazar nahin aata

ki reg-e-sahra bhi aksar sarab dekhti hai

bashar ko KHwab dikhati hai aur KHwabon mein

KHuda ki aankh naya inqilab dekhti hai

qalam dawat mere muntazir hain muddat se

kitab uThaun ki mujh ko kitab dekhti hai

kabhi chali nahin 'zahrab' wo hawa mujh mein

jo shaKH shaKH mahakte gulab dekhti hai