meri nigahon pe jis ne sham o sahar ki ranaiyan likhi hain

mirī nigāhoñ pe jis ne shaam o sahar kī ra.anā.iyāñ likhī haiñ

usī ne merī shaboñ ke haq meñ ye karb-āsā.iyāñ likhī haiñ

kahāñ haiñ vo aarzū ke chashme talab ke vo maujzan samundar

nazar ne āndhe kueñ banā.e haiñ fikr ne khā.iyāñ likhī haiñ

ye jism kyā hai ye zāviyoñ kā tilism kyā hai vo ism kyā hai

adhūrī āgāhiyoñ ne jism kī ye nisf golā.iyāñ likhī haiñ

kinā.e pairā.e isti.āre alāmateñ ramziye ishāre

kiran se paikar ko zāviye de ke ham ne parchhā.iyāñ likhī haiñ

suḳhan kā ye narm-sail dariyā Dhale to ik ābshār bhī hai

nasheb-e-dil tak utar ke paḌhnā baḌī tavānā.iyāñ likhī haiñ

mire mah o saal kī kahānī kī dūsrī qist is tarah hai

junūñ ne rusvā.iyāñ likhī thiiñ ḳhirad ne tanhā.iyāñ likhī haiñ

ye mere naġhmoñ kī dil-rasī terī jhiil ā.ankhoñ kī shā.erī hai

jamāl kī sat.h dī hai tū ne to maiñ ne gahrā.iyāñ likhī haiñ

meri nigahon pe jis ne sham o sahar ki ranaiyan likhi hain

usi ne meri shabon ke haq mein ye karb-asaiyan likhi hain

kahan hain wo aarzu ke chashme talab ke wo maujzan samundar

nazar ne aandhe kuen banae hain fikr ne khaiyan likhi hain

ye jism kya hai ye zawiyon ka tilism kya hai wo ism kya hai

adhuri aagahiyon ne jism ki ye nisf golaiyan likhi hain

kinae pairae istiare alamaten ramziye ishaare

kiran se paikar ko zawiye de ke hum ne parchhaiyan likhi hain

suKHan ka ye narm-sail dariya Dhale to ek aabshaar bhi hai

nasheb-e-dil tak utar ke paDhna baDi tawanaiyan likhi hain

mere mah o sal ki kahani ki dusri qist is tarah hai

junun ne ruswaiyan likhi thin KHirad ne tanhaiyan likhi hain

ye mere naghmon ki dil-rasi teri jhil aaankhon ki shaeri hai

jamal ki sath di hai tu ne to main ne gahraiyan likhi hain